बा...विठ्ठला !

विठ्ठला   केशवा  विठूराया  पंढरीनाथा

रुप   तुझे  पाहतो  चरणी  ठेवून  माथा

मूर्ती  तुझी  सावळी   गोलटोपी   शिरी

प्रसन्न  वदन   बरवे  दुःख   हरे  श्रीहरी

देवा  कानी  शोभती  लंब  मकरकुंडले 

मन  माझे  स्थिर  करी  दोन  कर्णफुले

कपाळी  तृतीय  नेत्र  वरी  चंदन टिळा 

कंठी  कौस्तुभमणी गळा तुळशीमाळा

वाम वक्षी  खळगी नाम श्रीवत्सलांछन

उजवे वक्षी वर्तुळखंड नाम श्रीनिकेतन

दोन  बाहूवरी  बांधियेले  दोन बाजुबंद

वरदायी  दोन  मनगटी  शोभे  मणीबंध

देवा, देखीले मी डोळा तुझे करकटेवरी

उभा दिसे  मज अठ्ठावीस युगे  वीटेवरी

तुझा  वाम हस्ती भासे  पांचजन्य शंख

उजव्या  हाती  धरीले तू  मोहक पंकज

रुप   तुझे  केशवा पाहिन  जन्मोजन्मी

नको  देऊ अंतर  तुझा भक्तांसी दे हमी

© प्रा.पुरुषोत्तम पटेल " पुष्प "