स्वप्नसुंदरी

प्रिये,तू स्वप्नसुंदरी होऊन

चंदेरी पंख लावून

सोनेरी कुंतल उडवित

पहाटस्वप्नी यावे

मलमली मिठीत घ्यावे !

तू तर माझी कमळकळी

पानावर निजलेली 

तू नभीची चांदणी

पाण्यातील रांगोळी

सोबत राहू गाऊ आपण

प्रेम तराणे नवे

प्रिये, तू स्वप्नसुंदरी होऊन

पहाटस्वप्नी यावे

मलमली मिठीत घ्यावे !

तू तर माझी सोनसाखळी

उर्वशी जशी हृदय जाळी

हास्यवदनी गाली खळी

नयन मोहक दंत कुंदकळी

न्हाऊ दे मन माझे

धुंद तुझ्या सवे

प्रिये,तू स्वप्नसुंदरी होऊन

पहाटस्वप्नी यावे

मलमली मिठीत घ्यावे !

© प्रा.पुरुषोत्तम पटेल 

         " पुष्प "

काय हो देवा?

काय हो देवा तुम्ही असे का वागता ?
भक्तांच्या ईच्छा  पुर्ण करण्यासाठी
पाच दहा रुपयाचे गोड चणे-फुटाणे मागता ?
माहिती नाही मला तुमच्या भेटीचा रस्ता
पण... तुम्हाला भेटाया म्हणे..
खुपच खाव्या लागतात खस्ता?
हे खरे की खोटे नक्की सांगाल का?
भक्तांपेक्षा म्हणे तुम्ही भोप्यांचेच वेडे
भक्त देतातआणि तुमच्या वतीने
तेच खातात पेढे...
त्यांचा उदरभरणासाठी तुम्हाला केलंय
युगे अठ्ठावीस विटेवरी उभे...
तरीही तुम्ही हात ठेवून कटेवरी
नि:शब्द निश्चल अविरत उभेच..
तुमचे हे वागणं पाहवलं नाही
म्हणून रागावून दूरच उभी रखुमाई
देवा... सांगा ना तुम्हाला प्रिय कोण?
उन्हा पावसात हजारो कोस अंतर चालून
तीन तीन-चार चार दिवस तुमच्या
निमिषमात्र भेटीला आसुसलेला भोळा भक्त...
की मागील दाराने क्षणात येऊन
भेटणारा दांभिक भक्त...?
उत्तर... आषाढी एकादशीला
की कार्तिक वारीला..?
वाट पाहतोय वेड्या आशेने..
©प्रा. पुरुषोत्तम पटेल
           म्हसावद.

बा...विठ्ठला !

विठ्ठला   केशवा  विठूराया  पंढरीनाथा

रुप   तुझे  पाहतो  चरणी  ठेवून  माथा

मूर्ती  तुझी  सावळी   गोलटोपी   शिरी

प्रसन्न  वदन   बरवे  दुःख   हरे  श्रीहरी

देवा  कानी  शोभती  लंब  मकरकुंडले 

मन  माझे  स्थिर  करी  दोन  कर्णफुले

कपाळी  तृतीय  नेत्र  वरी  चंदन टिळा 

कंठी  कौस्तुभमणी गळा तुळशीमाळा

वाम वक्षी  खळगी नाम श्रीवत्सलांछन

उजवे वक्षी वर्तुळखंड नाम श्रीनिकेतन

दोन  बाहूवरी  बांधियेले  दोन बाजुबंद

वरदायी  दोन  मनगटी  शोभे  मणीबंध

देवा, देखीले मी डोळा तुझे करकटेवरी

उभा दिसे  मज अठ्ठावीस युगे  वीटेवरी

तुझा  वाम हस्ती भासे  पांचजन्य शंख

उजव्या  हाती  धरीले तू  मोहक पंकज

रुप   तुझे  केशवा पाहिन  जन्मोजन्मी

नको  देऊ अंतर  तुझा भक्तांसी दे हमी

© प्रा.पुरुषोत्तम पटेल " पुष्प "

साखरझोप

पहाटेच्या साखरझोपेत....

एक गोड स्वप्न मी पाहिले

प्रिये!अमृतात न्हाली तू!

माझे भाग्य फळा आले

आज स्वप्नसुंदरीचे भाळी मी

कुंकू माझ्या नावाचे लाविले!

प्रिये! मधाळलेल्या देहाने

तू  समर्पित  मजला केले !

© प्रा.पुरुषोत्तम पटेल " पुष्प "

श्री सुखकर्ता

देवा तू गणराया

तूच बुद्धी दाता

संकट हराया

धाव रे मोरया 🙏

तूच प्रथमेश्वर 

तूच गणाधिश्वर

तूच सुखकर्ता 

धाव दु:ख हराया🙏

मुषक वाहना

पार्वती नंदना

तूच विघ्ननाशना

धाव रे मोरया🙏

तू शूर्पकर्णा

तू लंबोदरा

तू शंभोसुता

धाव रे मोरया🙏

अष्टविनायका तू

रिद्धी सिद्धी वरा

चिंतामणी तू रे

धाव चिंता हराया🙏

© प्रा.पुरुषोत्तम पटेल 

           " पुष्प "

           म्हसावद

   भ्रमणध्वनी-९४२१५३०४१२