मित्रहो, आज राष्ट्रीय कन्यादिन... त्यानिमित्त माझ्या लेकीविषयीच्या मनभावना...
लेक माझी भाग्यश्री
गुणांची हो खाण
लेक जन्मा येता लाभला
आई बाबांचा मान ||१||
चाल तिची दुडूदुडू
मन करते प्रसन्न
बोल बोबडे बोबडे
कोकिळेचे मंजुळ गान ||२||
लेक माझी खेळे बागडे
घरी दारी अंगणात
सप्तसूर निनादती
तिच्या रुणुझुणू पैजणात ||३||
रुप लेकीचं गोजीरं
जणू बावनखणी सोनं
देवाजीनं दिलं आम्हा
सारे कुबेराचं धन ||४||
अहो.. लेक माझी भासे
जणू वडाचे झाड..
जन्म एक अन् फेडिते
दोन घरांचे पाड ||५||
© प्रा. पुरुषोत्तम पटेल " पुष्प "
