अहोऽऽ वय वाढलंय आता !

अहो, तुम्हाला काही कळतं का ?

वयाचा तरी विचार करा थोडा

आता काय तरुण नाही हो तुम्ही

नका होऊ तुम्ही नातवाचा घोडा

अगं,जगण्याचं वय वाढलं माझं 

पण मन आजही तरुण आहे 

बालपणाची ती अल्लड आठवण

आजही नसानसात ताजी आहे

वय झालं वयऽऽअसं नको सांगू 

खंबीरपणे आपण उभे राहू

तरुणपणातील बाकी गोष्टी

आजही आपण करीत जाऊ

वय वाढतं तशी उमेद वाढते

आपण भरावी सुखाची झोळी

राग द्वेष सारे काही विसरुन

तिरसटपणाला मारु या गोळी

वय झालं तरी आपण आनंदात

नातवंडाशी हसत खेळत रहावं

जगण्याचे खाच खळगे सारे

त्यांना समजावत सुखात जगावं

अगं,वय वाढतं तसं वाढतं ग् 

आयुष्यात अनुभवांचं गाठोडे

कडू वा गोड राखून न ठेवता

देत जावे जवळचे थोडे थोडे

देवाला आजही आहे प्रार्थना

देवा जगू दे मला अजूनही

जीवनगाण्याचे सूर अजून मी

संगीतात तरी बांधलेले नाही

© प्रा.पुरुषोत्तम पटेल " पुष्प "

   म्हसावद

भ्रमणध्वनी-8208841364

  

दे ऐसे दान ! [प्रार्थना]

गोड तुझे नाम देवा अविट तुझे रुप

जन्मभरी पाहीन तुला द्यावे ऐसे दान !

जाईन मी जेथे तेथे,तू सोबती असावा

माऊली होऊन माझी सावली तू व्हावा

स्मरीण मी नित्य देवा तुझे ऐसे ध्यान… ।।१।।

जन्मभरी पाहीन तुला द्यावे ऐसे दान !

श्वास असे तो देवा गाऊ दे तुझे नाम 

देवा यावे भेटीलागी तू होऊन श्रीराम

जनीचा तू विठ्ठल तुकाच्या नारायण ।।२।।

जन्मभरी पाहीन तुला द्यावे ऐसे दान !

सहस्रकोटी सूर्य तेज तुझे जगन्नाथ

चक्रपाणि श्रीहरी तू लक्ष्मीचा नाथ

लक्ष्मी  सवे दर्शन  द्या हो मज  जनार्दन ।।३।।

जन्मभरी पाहीन तुला द्यावे ऐसे दान

© प्रा.पुरुषोत्तम पटेल " पुष्प "

आई

आई 

शब्दात  जिच्या सदैव माया 

आयुष्यभर झिजविते काया

उभी राहते उन्हा - पावसात

होते लेकराची छाया...आई !

उपवास नावे सोसते त्रास

बाळा भरवी मुखीचा घास

शब्दात तीच्या अमृत शिंपण

घरादाराच्या  श्वास ... आई !

नयनी लपवीते खारे पाणी

दुःख पिते देई जीवन संजीवनी

प्रसन्न वदने घरात दरवळे 

जिव्हाळ्याची जाई... आई  !

पहाटे उठते उशिरा निजते

मोल  ती  कसला  ना  घेते

लोभ ना तिजला मोठेपणाचा

जखमेवरची  फुंकर... आई !

राब राबते परी न विसरते

मन तिचे खोप्यातच रमते

नजर पिलावरी भिरभिरते

जणू ऊंच आकाशी घार...आई !

© प्रा.पुरुषोत्तम पटेल " पुष्प "

सजनवा [भूलोळी १-२ ]

सजनवा [भूलोळी - १]

ए सजनवा, सुनो तो !

प्रेमात घडतो उपवास

निंद तो अखियनसे चली गई

पाठवला मी मॅसेज दे ना सहवास

------------------------------------

ना जाओ [ भूलोळी - २ ]

यूॅं ना जाओ रुठकर

डोळे भरुन पाहिले नाही

यूॅं ही रुक जाओ दिल में भर लूॅं

तू मनमोहीनी रुप तुझे जणू जाई

© प्रा.पुरुषोत्तम पटेल " पुष्प "

चांदण्यात फिरताना!

चांदण्यात फिरताना कळले ग् मजला

राणी... तू  तर  शुक्राची  चांदणीच  ग् 

मंद  मंद  शितल  वा-याच्या  लहरी 

पेरीत  गेल्या  प्रितगंध  माझ्या मनी ग् 

© प्रा.पुरुषोत्तम पटेल " पुष्प "