माझी माय

[ आज जागतिक मातृ दिवस त्यानिमित्ताने आई चरणी समर्पित काव्यसुमन!💐🙏🙏🙏]

माझी माय

चालत होतो एकटा

होती ती एक भयाण रात्र

घेऊन अनवाणी दोन पाय

तुडवित होतो रस्ता…

खाचखळगे, दगडधोंड्यांनी भरलेला

कधी पडलो,कधी ठेचाळून पडलो

खाल्ल्या अनंत खस्ता

पायात घुसला काटा 

पोहचलो कसाबसा घरी

माझ्या येण्याची वाट पाहत…

चिंतेत बसली होती दारी

दोन्ही पाय रक्तबंबाळ पाहून 

मोकले धायऽऽधाय

जिव्हाळा हृदयीचा 

शांत राहिना…

कोण हो ती? 

ती तर माझी माय ! 

ती तर माझी माय!

©® प्रा.पुरुषोत्तम पटेल " पुष्प "

विभूति [कविता]

जगात पूज्य विभूति एकदाच येते जन्माला

होऊ  शकत नाही तुलना तिच्या कर्तृत्वाला

मॉसाहेब जिजाऊ एकच शिवरायांची आई

त्यांच्या तोडीचे  कार्य  कुणा जमायचे नाही

शून्यातून मुहूर्तमेढ केली हिंदवी स्वराज्याची

शिवरायांनी वाहिली काळजी स्वतः रयतेची

पावन गंगा भूवरी आणितो तो एक भगिरथ

ज्योती सावित्रीने  ओढीला  ज्ञान सुवर्ण रथ

विज्ञान अंतराळ  क्षेत्री  चमकले रत्न कलाम

टाटा-बिर्ला अंबानी पतंजली उद्योगा सलाम

हास्यलेखन जगी जन्मले चिंवी पुल गडकरी

दमा,रमेशमंत्री,भेंडे,नगरकर लेखन मनोहारी

कविता नाट्य कथा विश्वी रमले शिरवाडकर

कथा कादंबरी  रमिले देसाई नेमाडे खांडेकर 

पुन्हा न  होणे फडके टिळक गांधी सावरकर

भगतसिंग राजगुरु  सुखदेव अन्  आंबेडकर

धन्य महान  विभूति  ज्यांनी रचिला इतिहास

गाईन मी  किर्ती त्यांची श्वासात असेतो श्वास

करितो मी  लेखन  त्याहून  मी कधी ना मोठा

वंद्य  ह्या  विभूति वंदितो चरण शब्द न खोटा

      © प्रा.पुरुषोत्तम पटेल " पुष्प "

आधारवड

  

आज एक ऑक्टोबर... जेष्ठ नागरिक दिवस ! आज समाजात जेष्ठ नागरिकांना अनेक कुटुंबांत घृणास्पद वागणूक देण्याचे प्रकार दैनिकातून व दूरदर्शन वरील बातम्यांतून वाचायला-पाहायला मिळतात.हे निंदणीय आहे.शासनाला जेष्ठांचे अधिकार सुरक्षित राहावे.त्यांना माणूस म्हणून जगता यावे.यासाठी कायदे करावे लागावे.यापेक्षा मोठे दुर्दैव ते कोणते ? ज्येष्ठांचा प्रत्येकाने मान-सन्मान राखावा.कारण शिरवाडकरांनी म्हटले आहे…

" आजचे प्रत्येक हिरवे पान …

हे उद्याचे पिवळे पान आहे ! " ही जाणीव प्रत्येकास व्हावी या किमान अपेक्षेने लिहिलेली ही एक कविता !

आज जेष्ठ नागरिक दिन

दिनांक असे एक ऑक्टोबर

मी वंदन करीतो तुम्हा 

जोडूनी माझे दोन्ही कर  

जेष्ठ तुम्ही आमूचे दैवत

राखीन मी तुमचा मान 

संस्कार गंगोत्री मज जणू

सदैव करीन मी सन्मान 

विनंती एकच करु नका हो

तारुण्याचा कणभर गर्व

आजची हिरवी पाने 

होई उद्याला पिवळीजर्द 

जेष्ठ सहवासाचा लाभ

मिळे भाग्यवंता घरा

युगे अठ्ठाविस उभा राहिला

जगजेठी पुंड्याचा दारा

जेष्ठ आजी आणि आजोबा

नातवांची जणू गीता-गाथा

आज शत शत नमन तुम्हा

कृतज्ञ चरणी ठेवितो माथा!

एक विनंती सकलांना

नका विसरु जेष्ठांचे श्रम

सोने-चांदीचा निर्मिला तरी

नका दावू हो वृद्धाश्रम !

© प्रा.पुरूषोत्तम पटेल " पुष्षम् "

          म्हसावद