प्रेमनगर

प्रेमाच्या वाटेवर आहे

माझ्या  सखीचं  गाव

दुरदूर   देशी  ओळख

प्रेमनगर   त्याचे  नाव

लता - वेलीची  वसने

करीती  येथे परिधान

पुष्परिणीच्या   बागेत

करिती   मंगल  स्नान

बासुरीची धुन साधते

मंजूळ   मधुर  संवाद

येथे   सान असो थोर

ठाऊक  नसे हो  वाद

पुष्प  कळ्यांचा माळा

शोभे  ललनांचा  गळा

कुंतली  सुगंधी  गजरा

धन्य वाटे पाहता डोळा

गाव वेशीवर येता होई

स्नेह -सौख्याने स्वागत

नक्की या  हं भेटायला

प्रेमनगरच्या  दुनियेत ! 

©® प्रा.पुरुषोत्तम पटेल

" पुष्प "

सप्त रेशमी धागा

प्रिये,एक रेशमी धागा 

तुझ्या माझ्या प्रीतिचा 

नाजूक नात्याचा !        

 प्रिये,दुसरा रेशमी धागा 

आपल्या सहजीवनाचा 

अतूट विश्वासाचा!

 प्रिये,तिसरा रेशमी धागा 

आपल्या मनगटावर बांधलेला 

आयुष्यभर सोबतीचा! 

प्रिये,चौथा रेशमी धागा 

संसाररथ बांधणारा

सुखी नातेसंबधाचा ! 

प्रिये,पाचवा रेशिम धागा 

एकमेकां समर्पणाचा 

जसा शत जन्मीचा! 

प्रिये,सहावा रेशमी धागा 

न्याय-नीति-धर्माचा 

सप्तवचन पालनाचा! 

प्रिये,सातवा रेशमी धागा 

घरादाराला बांधणारा 

संकटातही टिकून राहणारा!   

 

©® प्रा.पुरुषोत्तम पटेल " पुष्प " 

माझे गुरु

आज आषाढ शुद्ध पौर्णिमा: व्यासपौर्णिमा अर्थात गुरुपौर्णिमा - या पावन दिनी समस्त ज्ञात अज्ञात गुरुंना विनम्र साष्टांग नमन!💐🙏

आज उगवला अती पावन दिन

आपण गुरुदेवा चरणी होऊ लिन

आई बाप आद्य गुरु आपुले

जन्म देऊनी जग त्यांनी शिकविले

द्वितीय गुरु ते गुरुकुली भेटे

त्यांचा शब्द जणू अमृत वाटे

कृष्णासम सखा तृतीय गुरु

संकटात दूर करीतो अंधारु

चतुर्थ गुरु सखी सचिव ती

देतसे संसाराला सामर्थ्य ती

गुरु तो पंचम मानावी सृष्टी

दुःख क्लेश जाळाया देई दृष्टी

षष्ठ गुरु केली मी वसुंधरा

देते पेरावे ते उगवे संदेश खरा

सप्तम गुरु करावा घननीळा

शिकवी रिते व्हावे देऊन सकळा

अष्ट गुरु सागर सरिता झरा

तिरा येता जीव उद्धरावा खरा 

नवम् गुरु पुष्प लता वृक्षवल्ली

शत्रू मित्र विसावता तळी देती सावली

दशम गुरु चंद्र सूर्य ग्रह तारे

भेद न करता नित्य सृष्टी उदधारे

घडले दर्शन जसे गायिली गाथा

सकल गुरु चरणी ठेवितो माथा

©® प्रा.पुरुषोत्तम पटेल " पुष्प "

नको ना रे बाबा…

नको  ना रे बाबा मला असा दूर सारु

तूच  तर  माय  माझी मी तुझी वासरु

बाबा...तू वटवृक्ष तर मी तुझी पारंबी

तुझ्या जीवनाची आहे  मी सुंदर छबी

नको ना रे  बाबा मला  असा दूर करु

तूच  तर  माय माझी  मी तुझी वासरु

बाबा…तू  शिंपले  तर  मी  तुझा मोती

तुझी  माझी सुंदर अनमोल गोड नाती

तुझा डोळ्यांत ओघळते होऊन मी अश्रू

नको  ना  रे  बाबा मला असा दूर सारु

बाबा…तू   बासरी  तर   मी   तिचे  सूर

माझं  हसणं  खेळणं  देई निराशेला नूर

नको  ना   सोडू   तुझं  लाडकं  कोकरु

नको  ना  रे  बाबा  मला असा दूर सारु

©® प्रा.पुरुषोत्तम पटेल " पुष्प "

भक्तीचा छंद

प्रभो मज लागो । भक्तीचा हा छंद ।

गाईन मी नाम   । आवडीने ।।१।।

गोड  तुझे  नाम । गोड तुझे रुप ।

पाहीन मी रुप   । आवडीने ।।२।।

तुच माझी माय  । तुच माझा बाप ।

चरणाचा दास   । आवडीने ।।३।।

द्यावा मज वर   । गोड तो प्रसाद ।

करावी तू कृपा  । आवडीने ।।४।।

©® प्रा.पुरुषोत्तम पटेल " पुष्प "